我同樂樂嘅生日，相信你哋好多位都記得，而你哋嘅生日祝福，我哋已經全部收到晒，多謝多謝！
海洋公園啲哥哥姐姐噚日幫我哋開咗一個別開生面嘅生日會！有巨型生日卡(有你哋啲手印架！)，有海洋公園主席盛智文先生、香港海洋公園保育基金主席陳晴小姐同香港童聲合唱團唱生日歌俾我哋聽，仲有「生日冰蛋糕」！裏面有齊我哋最鐘意食嘅蘋果、紅蘿蔔、竹筍同竹葉，一次過滿足哂四個為食嘅願望。安安同佳佳都有同我哋一齊分享蛋糕添！我真係覺得好開心同好幸福！
喺哩個咁開心嘅日子，其實我都會諗起生活喺四川嘅大熊貓朋友同謢理員哥哥姐姐… 唔知佢哋而家點呢？較早前嘅地震令到四川嘅大熊貓基地遭受好大嘅破壞，雖然我知道海洋公園嘅哥哥姐姐、香港海洋公園保育基金加埋香港郵政發售嘅熊貓紀念郵品，已經先後捐咗三百多萬支援佢哋，不過聽人講，四川大熊貓基地要回復正常運作，仲有一條好漫長嘅路要行… 我同樂樂傾過，我哋都好希望四川嘅大熊貓朋友同埋所有工作人員都同我哋一樣開開心心，所以我哋決定將今年嘅生日願望送俾四川嘅佢哋！（用樂樂嘅口吻）熊哋嘅生日願望: 齊來幫助仍在災區超過1,000隻受影響嘅大熊貓！
由聽日至8月31日，嚟海洋公園探我哋四隻大熊貓，而同時一次過捐款最多嘅朋友，可以得到四人來回成都大熊貓繁育研究基地之旅。所有籌得嘅善款都會用嚟支援四川嘅大熊貓朋友！希望大家多多支持！
順帶一提，為咗令每一個嚟呢個Blog關心海洋公園大熊貓嘅朋友都睇得開開心心，管理員哥哥姐姐幫呢個Blog制定咗一啲好簡單嘅守則，放咗係左手邊sidebar，大家可以睇吓。記住喎，你哋每一位嚟熊貓館同熊貓Blog探我、樂樂、安安同佳佳嘅，我哋都視你哋為好朋友架，希望你哋每一次見我哋嘅時候，臉上都掛住笑容好似我哋四個咁成日都笑啦！
|
|
更何況護理員哥哥姐姐其實都好關心我哋，佢哋一定要了解熊哋嘅身體狀況，先可以幫熊哋作出最好嘅安排。我真係好多謝一班細心照顧熊哋嘅護理員！再加埋你地咁錫熊哋，熊哋真係覺得幸福得不得了哦！
好多熊貓fans 嚟同我哋慶祝，唱生日歌同捐款支助「大熊貓基地震後重建基金」。香港海洋公園保育基金嘅哥哥姐姐，現正同四川臥龍自然保護區嘅同事們努力，為喺雅安嘅職工們提供工作環境。
